Ծանոթանանք, այսօրվանից ես նաև քո թերթն եմ

Թույլ տուր ներկայանալ` «ԱՊԱԳԱ ԲԺԻՇԿ»: Անունս անգամ հստակ հուշում է, թե ով է լինելու գլխավոր ընթերցողս: Խոստանում եմ ուսանողական տարիներին քեզ հետ լինել, աշխատելով որքան հնարավոր է օգտակար լինել քեզ:

Կներկայացնեմ համալսարանական այն որոշումները, որոնք կկողմնորոշեն քեզ, կջանամ իմ թողարկումների հերոսներ դարձնել այնպիսիներին, ում օրինակը կարող է ոգևորել քեզ որպես բժիշկ ու դեղագետ կայացման տևական ճանապարհիդ մի հատվածում, որ ուսումնառության տարիներ անունն է կրում: Այսօր այդ տարիները քեզ թվում են չափազանց երկար ժամանակահատված:

Մինչդեռ, եթե հիմք ընդունենք յուրաքանչյուր տարեվերջին իմ էջերում տպագրվող մայր կրթօջախին հասցեագրված շրջանավարտներին հրաժեշտի հուզումնառատ խոսքերը` ուսանողական տարիները ակնթարթի տևողություն ունեն: Հիմա սա անհավանական է թվում քեզ: Բայց կգա օրը, և ես այս մասին կհիշեցնեմ: Իսկ այդ օրը կլինի հուզիչ, գեղեցիկ ապրումներով, սպասելիքներով լի` ապագայի հանդեպ, որին արդեն այնքան մոտ ես լինելու, մեծ հավատով առլեցուն…

Բայց, սպասիր, ես մոռացա ամենակարևորը: Այս ամենի համար հարկավոր է լինելու աննշան մի մանրուք, որի մասին, ինձ թվում է` հիշեցում պետք չէ: Դու լավ գիտես, որ եկել ես սովորելու: Ուրեմն` ՍՈՎՈՐԵԼ, ՍՈՎՈՐԵԼ, ՍՈՎՈՐԵԼ…

Մաղթում եմ քեզ դառնալ այնպիսի ուսանող, ում համար համալսարանի պաշտոնաթերթի էջերում տեղ գտնվի: Հավատա, դա շատ պատվաբեր է: Դրանում կհամոզվես ինքդ, երբ անունդ հայտնվի ուսման գերազանցիկների, խորհրդարանականների, հասարակական ակտիվությամբ աչքի ընկածներից լավագույնների ցուցակում: Քո անձնական արխիվում երկա¯ր տարիներ պահպանելու ես իմ այն թողարկումը, որի էջերում քո մասին հոդված կլինի: Եվ ես ու դու հավերժ բարեկամներ կմնանք:

Կարծում եմ` ծանոթությունն ստացվեց: Մնում է սպասել իմ ու քո առաջին հանդիպմանը, որին ես սպասում եմ մեծ անհամբերությամբ` լաբորատոր մասնաշենքի 4-րդ հարկում`«ԱՊԱԳԱ ԲԺԻՇԿ» թերթի խմբագրությունում: 

«ԱՊԱԳԱ ԲԺԻՇԿ»

Այսօրվանից նաև քո´ լավագույն  բարեկամն ու խորհրդատուն

Հարցեր, պատասխաններ, մեկնաբանություններ